بارہ بنکی،24؍فروری (ایس او نیوز؍ایجنسی) کانگریس جنرل سکریٹری پرینکا گاندھی واڈرا نے جمعرات کو کہا کہ اترپردیش میں بھارتیہ جنتا پارٹی (بی جے پی) حکومت نے گزشتہ پانچ سالوں میں خواتین کو صرف رات دن کھیت کی رکھوالی کروانے کے سوا کچھ نہیں دیا اور الیکشن آنے پر ذات مذہب کے نام پر تقسیم کر کے ووٹ مانگ رہے ہیں، زید پور اسمبلی حلقے کے تحت مسولی قصبے میں ایک عوامی ریلی سے خطاب کرتے ہوئے پرینکا واڈرا نے کہا ’یہ بی جے پی حکومت ہے، جس کو پانچ سالوں تک وقت نہیں ملا کی ریاست کی خواتین کے بارے میں سوچیں۔ انہوں نے صرف ریاست کی خواتین کو رات دن کھیتوں میں ان کے ذریعہ چھوڑے گئے آوارہ مویشیوں سے فصلوں کی رکھوالی کرانے کا کام دیا ہے۔

کانگریس لیڈر نے کہا کہ میں نے خود دیکھا ہے کہ خواتین کس طرح سے رات میں کھیت کی رکھوالی کرتی ہیں۔ اب ان کے پاس کہنے اور کرنے کے لئے کچھ بچا نہیں ہے۔ تو اب یہ خواتین کے بارے میں الیکشن کے وقت سوچنے لگے ہیں۔ انتخابی ریلیوں میں خواتین کے سب سے بڑے بہی خواہ بن گئے ہیں۔ انہوں نے کہا کہ بی جے پی صرف مذہب اور ذات کے نام پر لوگوں کو تقسیم کر کے ہمیشہ ووٹ مانگتی رہی ہے۔ ملک کی ترقی اور نشونما کے نام پر انہوں نے کچھ کیا ہی نہیں۔ کانگریس نے سوئی سے لے کر سب کچھ بنایا ہے اور بی جے پی حکومت نے صرف ریلوے اسٹیشنوں اور ائیر پورٹ کے نام تبدیل کر کے ان کو بیچنے کا کام کیا ہے۔

کانگریس جنرل سکریٹری نے کہا کہ اگر اترپردیش کی بات کریں تو یہاں کی جتنی بھی سیاسی پارٹیاں ہیں ایس پی۔ بی ایس پی یا بی جے پی سب ذات پات اور مذہب کے نام پر ووٹ مانگنے میں مشغول ہیں، لیکن کانگریس ان سب سے الگ ہے کیونکہ اہم نے اپنے میعاد کار میں ترقیاتی کام کئے ہیں۔ اس لئے ہم سبھی مذاہب کو ساتھ لے کر ترقی کے نام پر ووٹ مانگ رہے ہیں۔ انہوں نے عوام سے کہا کہ مجھ سے وعدہ کیجئے کہ بارہ بنکی کی سبھی سیٹوں کو جتانے کا کام کریں گے۔